ఓరుగల్లు9నేషనల్ టీవీ :తెలంగాణలో ఇక వెహికల్స్ అన్నీ రాష్ట్ర కోడ్ టీఎస్కు బదులు టీజీతోనే రిజిస్ట్రేషన్చేసేందుకు కేంద్రం గ్రీన్ సిగ్నల్ ఇచ్చింది. తెలంగాణ ప్రత్యేక రాష్ట్రం ఏర్పడిన తర్వాత రిజిస్టర్ అయిన అన్ని వాహనాలపై రాష్ట్ర కోడ్ ‘టీఎస్’ గా పేర్కొంటున్నారు. అయితే, రాష్ట్రంలో ఇటీవల కొత్తగా కొలువుదీరిన కాంగ్రెస్ ప్రభుత్వం తెలంగాణ ఉద్యమ ఆకాంక్షలకు అనుగుణంగా వాహనాలపై టీఎస్కు బదులుగా టీజీ ఉండాలని నిర్ణయించింది. ఇందుకు అనుగుణంగా గతంలోనే గెజిట్ విడుదల చేసిన కేంద్రం ఉపరితల రవాణా శాఖ, గురువారం నోటిఫికేషన్ రిలీజ్ చేసింది.
దీంతో ఇకపై వాహనాల నంబర్ ప్లేట్లపై టీఎస్ స్థానంలో టీజీ ఉండే విధంగా రిజిస్ట్రేషన్ చేయాలని తెలిపింది. కేంద్రం నోటిఫికేషన్ ప్రకారం.. సీరియల్ నంబర్ 29 ఏ కింద టీఎస్ స్థానంలో టీజీగా సవరించింది. కాగా, మూడు నెలల నుంచి రాష్ట్రంలో వాహనాల రిజిస్ట్రేషన్లన్నీ టీజీ పేరుతోనే జరుగుతున్నట్టు తెలంగాణ ఆర్టీఏ జాయింట్కమిషనర్ రమేశ్ కుమార్ గురువారం వెల్లడించారు. కేంద్ర ప్రభుత్వం గతంలో జీవో జారీ చేసిందని, దాని ప్రకారమే రిజిస్ట్రేషన్లు జరుగుతున్నాయని ఆయన స్పష్టం చేశారు.
